TOShKENT, 5 fev — Sputnik. 2020–2023 yillarda davlat-xususiy sheriklik shartlari asosida hududlarda yengil konstruksiyali yopiq muz qoplamali maydonlar quriladi. Bu O‘zbekiston prezidentining “Qishki sport turlarini rivojlantirish chora-tadbirlari to‘g‘risida”gi qarorida belgilangan.
Qaror bilan tasdiqlangan dasturga ko‘ra, 2020–2023 yillarda qishki sport turlari rivojlantiriladi, xalqaro sport musobaqalarida O‘zbekiston sportchilarining munosib ishtiroki ta’minlanadi.
Shuningdek, “O‘zko‘rgazmasavdo” binosi bazasida qishki sport turlari sanalgan figurali uchish, short-trek, korling bo‘yicha musobaqalar o‘tkazish, ko‘rgazmalar va forumlar o‘tkazishga mo‘ljallangan zamonaviy muz saroyi tashkil etiladi.
2020–2023 yillarda davlat-xususiy sheriklik shartlari asosida hududlarda yengil konstruksiyali yopiq muz qoplamali maydonlar quriladi.
O‘zbekiston davlat jismoniy tarbiya va sport universitetida esa 2020-2021 o‘quv yilidan boshlab qishki sport turlari kafedrasi tashkil etiladi.
Bundan tashqari 2023-yil 1-yanvarga qadar Qishki sport turlari assotsiatsiyasi, O‘zbekiston xokkey federatsiyasi, ularning hududiy bo‘linmalari, qishki sport turlari bo‘yicha professional klublari va nodavlat bolalar sport maktablari mol-mulk hamda bir qancha soliq va bojxona to‘lovlaridan ozod etiladi.