TOShKENT, 26 yanv – Sputnik. Xalqaro press-klubning O‘zbekiston prezidentining Oliy Majlisga yo‘llagan murojaatiga bag‘ishlangan sessiyasida so‘zga chiqqan Senat raisining birinchi o‘rinbosari Sodiq Safoyev mazkur hujjat orqasida chuqur tahliliy o‘rganish yotishini ma’lum qildi. Bu haqda Sputnik muxbiri xabar qildi.
“Bu murojaatnomaning orqasida chuqur tahliliy o‘rganish yotadi. Mazkur hujjatni bir marta o‘qib chiqish yoki bir marta eshitish kifoya qilmaydi. Har birimiz, parlament a’zolari, hukumat a’zolari, ilm-fan namoyandalari, butun jamiyatimiz uni qo‘lga olib qayta-qayta o‘qib chiqishi kerak", - dedi Safoyev.
Uning so‘zlariga ko‘ra, bu hujjat faqatgina keyingi yil uchun mo‘ljallangan emas. Bu keyingi 10-yillik uchun mo‘ljallangan.
“Men uchun shunday xulosa – O‘zbekiston muhtasham 10-yillik davriga kirdi. Bu biz uchun hayot-mamot masalasi bo‘ladi. Ya’ni shu 10-yil davomida qilinadigan ishlar tariximizda eng muhim davr bo‘ladi, desak, mubolag‘a bo‘lmaydi”, - dedi u.