TOShKENT, 26 dek — Sputnik. “Toshkent” avtovokzalidan Moskvaga yo‘l olgan avtobus 25-dekabr kuni “Novoyasenevskaya” avtostansiyasiga yetib bordi. Bu haqda Transport vazirligi axborot xizmati ma’lum qildi.
Qayd etilishicha, “Toshkent” avtovokzalidan Rossiya Federatsiyasi poytaxti Moskva shahriga yo‘l olgan “Uzautotrans service” korxonasi avtobusi 25-dekabr kuni kechqurun “Novoyasenevskaya” avtostansiyasiga yetib borgan.
Avtobusning deyarli uch yarim ming kilometrli masofani bosib o‘tishga 64 soat vaqt sarflagani aytilmoqda.
Ushbu yo‘nalish bo‘ylab muntazam avtobus qatnovlari haftasiga ikki marotaba, dushanba va payshanba kunlariga belgilangan.
Eslatib o‘tamiz, avvalroq Toshkent – Moskva yo‘nalishida avtobus qatnovi yo‘lga qo‘yilishi haqida xabar qilgan edik.