TOShKENT, 23 dek – Sputnik. MDH missiyasi kuzatuvchilari O‘zbekistonda bo‘lib o‘tgan parlament saylovlarini demokratik va shaffof deb tan oldi. Bu haqda MDH Ijroiya qo‘mitasi raisi, missiya rahbari Sergey Lebedev ma’lum qildi.
“Missiya saylovlar O‘zbekiston Konstitutsiyasi, respublikadagi amaldagi qonunchilikka muvofiq, demokratik va shaffof o‘tkazildi deb hisoblaydi. Kuzatuvchilar uchun barcha sharoitlar, jumladan, ham saylov okruglari va uchastkalari rahbarlari bilan, ham saylovda ishtirok etayotgan siyosiy partiyalar vakillari bilan uchrashuvlar tashkillashtirilgan edi ”, - dedi Lebedev MSKning Xalqaro matbuot markazidagi anjumanda.
Eslatib o‘tamiz, 22-dekabr kuni O‘zbekistonda parlament saylovlari bo‘lib o‘tdi. Unda saylovchilarning 71,1 foizi ishtirok etdi. Markaziy saylov komissiyasi bugun, 23-dekabr kuni soat 14:00da O‘zbekistonda o‘tkazilgan parlament saylovining dastlabki natijalarini e’lon qilishni rejalashtirmoqda.