TOShKENT, 17 dek – Sputnik. O‘zbekiston prezidenti Shavkat Mirziyoyev 17-dekabr kuni Yaponiyaga rasmiy tashrif dasturidagi birinchi manzil - Nagoya shahriga keldi, deb xabar qildi prezident matbuot xizmati.
Tubu xalqaro aeroportida davlat rahbarini Yaponiya tashqi ishlar vazirining o‘rinbosari Sinichi Nakatani, Nagoya shahri meri Takasi Kavamura va boshqa rasmiy shaxslar kutib oldi.
Tashrifning asosiy tadbirlari 18-dekabr kuni boshlanadi.
O‘zbekiston prezidenti Nagoya va Tokio shaharlarida qator ikki tomonlama uchrashuv va tadbirlar o‘tkazadi.
Nagoyada Aichi prefekturasi va shahar meriyasi rahbarlari bilan muzokaralar bo‘lib o‘tadi. Shuningdek, Nagoya universitetiga tashrif buyurish ko‘zda tutilgan.
Shu kuniyoq Yaponiya Bosh vazirining o‘rinbosari, moliya vaziri Taro Aso, "O‘zbekiston-Yaponiya" parlamentlararo do‘stlik ligasi faollari hamda Yaponiyaning yetakchi kompaniya va banklari vakillari bilan uchrashuvlar o‘tkazilishi rejalashtirilgan.