TOShKENT, 27 noya – Sputnik. Uy-joy kommunal xizmat ko‘rsatish vazirligi Yagona davlat suv fondi suvlarini hisobga olish, monitoring qilish, xavfsizligi va sifatini ta’minlashni muvofiqlashtirish sohasida vakolatli davlat organi etib belgilandi. Bu prezidentning tegishli farmonida ko‘zda tutilgan.
Shu munosabat bilan vazirlik zimmasiga bir qator qo‘shimcha vazifalar yuklandi.
Jumladan, vazirlik suv balansining yagona axborot tizimini yaratgan holda Yagona davlat suv fondi suvlarining miqdoriy va sifat ko‘rsatkichlari to‘g‘risida ma’lumotlarni to‘plash, umumlashtirish va tizimlashtirish orqali respublikaning yagona suv balansini shakllantirishni tashkil etadi
Vazirlikning markaziy apparati tarkibiga Yagona davlat suv fondi suvlarini hisobga olish, monitoring qilish, xavfsizligi va sifatini ta’minlash kabi masalalarga mas’ul bo‘lgan vazirning birinchi o‘rinbosari lavozimi kiritildi.
Vazirlik markaziy apparati tarkibida quyidagilar tuzildi:
- Yagona suv balansini shakllantirish va monitoring qilish bosh boshqarmasi;
- Yagona davlat suv fondi suvlarining xavfsizligi va sifatini ta’minlash boshqarmasi;
- Suv ta’minoti va suv chiqarish tizimlariga zamonaviy texnologiyalarni joriy etish boshqarmasi.