TOShKENT, 9 okt — Sputnik. 2019 yilning sakkiz oyi mobaynida Tojikiston O‘zbekistondan 9,4 million dollarlik gaz sotib oldi. Bu haqda Sputnik Tojikiston mamlakat Energetika va suv resurslari vazirligi ma’lumotlariga asoslanib xabar qildi.
Shu bilan birga, Tojikistonning “Tadjiktransgaz” gaz taqsimlovchi kompaniyasi ushbu davrda qancha o‘zbek gazi import qilinganini ochiqlamagan.
Energetika vazirligi ma’lumotlariga qaraganda, o‘tgan yili O‘zbekistondan Tojikistonga 54 million kub metr gaz xarid qilingan.
Import qilingan gaz bilan mamlakatning yigirmadan ortiq tashkilotlari, jumladan, Tojikiston alyuminiy kompaniyasi ta’minlangan.
Eslatib o‘tamiz, joriy yilning boshida "Tojiktransgaz" kompaniyasi rahbarining birinchi o‘rinbosari Shavkat Shoimzoda kompaniya joriy yilda O‘zbekistondan 200 million kub metr tabiiy gaz sotib olishni rejalashtirayotganini ma’lum qilgan edi.