TOShKENT, 19-iyul — Sputnik. Prezident Shavkat Mirziyoyev aholining keng qatlamlari uchun hamonbop bo‘lgan yengil avtomobilning yangi zamonaviy modeli ishlab chiqarishni topshirdi.
Shavkat Mirziyoyev imzolagan “O‘zbekiston Respublikasi avtomobil sanoatini jadal rivojlanish bo‘yicha qo‘shicha chora-tadbirlar to‘g‘risidagi” qarorida 2019–2023 yillarda avtomobil sanoatini rivojlantirishning asosiy ko‘rsatkichlari belgilab berilgan.
Xususan:
- yengil avtomobillar ishlab chiqarish hajmini 350 ming donagacha oshirish;
- yengil avtomobillarni mahalliylashtirish darajasini o‘rta hisobda 60 foizgacha yetkazish;
- yuk avtomobillari va avtobuslar ishlab chiqarish hajmini 10 ming donagacha oshirish;
- avtomobillarning yillik eksport hajmini 100 ming donagacha yetkazish;
- korporativ boshqaruvning zamonaviy usullarini, shuningdek, “ERP” avtomatlashtirilgan hisobga olish tizimini joriy etish;
Shuningdek, qaror bilan aholining keng qatlamlari uchun hamonbop bo‘lgan yengil avtomobilning yangi zamonaviy modeli ishlab chiqarilishini nazarda tutgan holda avtomobillarning modellar qatorini yangilash belgilab qo‘yilgan.
Eslatib o‘tamiz, avvalroq 2019-yil 1-oktabrdan keyin tuziladigan shartnomalar bo‘yicha UzAutoMotors AJ tomonidan ishlab chiqariladigan avtomobillarga aksiz solig‘i bekor qilinishi haqida xabar qilgan edik. Bundan tashqari, O‘zbekistonda 1-oktabrdan trade-in dasturi ishga tushiriladi. Unga ko‘ra eski avtomobilni qo‘shimcha to‘lov bilan yangisiga almashtirish mumkin bo‘ladi.