TOShKENT, 18-may - Sputnik. Belarus Respublikasi harbiylari "Jangovar hamdo‘stlik—2019" hamkorlikdagi mashg‘ulotlarida ishtirok etish uchun Il-76md harbiy-transport samolyotida Farg‘ona aeroportiga yetib keldi, deb xabar qilmoqda Mudofaa vazirligi matbuot xizmati.
Ta’kidlanishicha, 22 nafar belarus harbiy xizmatchilari polkovnik Oleg Kostromin boshchiligida o‘zbekistonlik mutaxassislar bilan o‘tkaziladigan hamkorlikdagi maxsus-taktik o‘quv mashg‘ulotlarida qatnashadi.
O‘quv mashg‘ulotlar 20—27 may kunlari Namangan viloyatidagi "G‘urumsaroy" poligonida bo‘lib o‘tadi va u ikki davlat o‘rtasida xavfsizlik sohasidagi hamkorlikni yanada rivojlantirish bo‘yicha amaliy harakatlar rejasiga asosan tashkil etilmoqda.