O‘zbekiston poytaxti Toshkent shahrida 1-3 fevral kunlari VETERAN veteran-jangchilar va nogironlar birlashmasi tashkil topganining 25-yilligi hamda sovet qo‘shinlarining Afg‘onistondan chiqarilganining 30-yilligiga bag‘ishlangan keng ko‘lamdagi tadbirlar o‘tkazilmoqda.
1-fevral kuni o‘tkazilgan tantanali tadbirlarda "Boyevoe bratstvo" xalqaro ittifoqi Oliy kengashi a’zosi, Sovet ittifoqi Qahramoni general-leytenant Ruslan Aushev; RF Federal kengash Federal kengashi a’zosi, Afg‘oniston veteranlari Rossiya ittifoqi boshqarmasi raisi Frans Klinsevich, shuningdek, Belarus, Ukraina, Moldova, Gruziya, Qozog‘iston, Qirg‘iziston va Boltiqbo‘yi mamlakatlari veteran tashkilotlari rahbarlari ishtirok etdilar.
Toshkentda 1-fevral kuni MDH davlatlari hukumat rahbarlari Kengashi huzuridagi jangchi-baynalmillalchilar ishlari bo‘yicha qo‘mitasining Muvofiqlashtiruvchi kengash majlisi o‘tkazildi. Xuddi shu kunning o‘zida mehmonlar Temuriylar davlat muzeyi va Qurolli Kuchlar muzeyi ekspozitsiyalari bilan tanishdilar va shahardagi tarixiy obidalarni ziyorat qildilar.
2-fevral kuni Mustaqillik maydonidagi memorial-majmuada Afg‘onistonda sovet qo‘shinlari tarkibida o‘z harbiylik burchini ado etayotib halok bo‘lgan 1514 inson ismlari o‘yib yozilgan Xotira Kitobining tantanali ochilish marosimi bo‘lib o‘tdi. So‘ngra "Turkiston" saroyida veteranlarni taqdirlash marosimi o‘tkazildi va ularga bayram konserti tashkillashtirildi.
Tadbirga O‘zbekiston Respublikasining barcha viloyatlaridan veteranlar, halok bo‘lgan harbiylar oilasi a’zolari, jamoatchilik va yoshlar tashkilotlari a’zolari taklif etildi.
Barcha tadbirlar O‘zbekiston Bosh vaziri Abdulla Aripov qaroriga binoan Hukumat, Mudofaa vazirligi, Yoshlar ittifoqi va jamoatchilik tashkilotlari ko‘magida tashkillashtirilgan.