TOShKENT, 20 avg – Sputnik. FIFA O‘zbekiston Milliy terma jamoasiga yangi Mersedes avtobusini sovg‘a qildi va ushbu avtobus O‘zbekistonga yetib keldi, deb xabar qilmoqda O‘FA matbuot xizmati.
Ushbu sovg‘a FIFA prezidenti Janni Infantino tomonidan O‘zbekiston futbol assotsiatsiyasi 1-vitse-prezidenti Umid Ahmadjonov bilan bo‘lgan uchrashuv natijasida va’da berilgan edi.
“Shu paytga qadar O‘zbekiston milliy terma jamoasi yig‘in davomida hamda uchrashuvlarga borish uchun klublardan olingan avtobuslardan foydalanib kelgan. Endilikda terma jamoamizning o‘z avtobusi bor”, - deyilgan xabarda.
Mercedes Travego M rusumidagi ushbu avtobus 46 kishiga mo‘ljallangan bo‘lib, 483 ot kuchiga ega. Avtobus barcha qulayliklarga ega bo‘lib, zamonaviy xavfsizlik vositalari bilan jihozlangan.
Yangi avtobus O‘FA logotiplari va milliy ramzlar bilan bezatiladi hamda bundan buyon yig‘in va uchrashuvlar davomida milliy terma jamoamiz futbolchilari uchun xizmat qiladi.