TOShKENT, 10-iyul — Sputnik. Shayxontohur tumanidagi “Malika” savdo majmuasida sotuvchi va xaridor o‘rtasida pichoqbozlik sodir bo‘ldi. Toshkent shahar IIBB mazkur hodisaga izoh berdi, deb yozadi Sputnik muxbiri.
Hodisa 8-iyul kuni sodir bo‘lgan. Kelishmovchilik oqibatida xaridor sotuvchining ko‘krak qismiga pichoq uradi. So‘ngra o‘zining “Neksiya” rusumli mashinasida voqea joyidan qochib ketadi.
Jabrlangan sotuvchi tibbiy yordam so‘rab Yunusobod tumanidagi 7-shahar klinik kasalxonasiga murojaat qilgan.
Mazkur holat yuzasidan O‘zbekiston Jinoyat kodeksining 277-moddasi (Bezorilik) bo‘yicha jinoyat ishi qo‘zg‘atildi.
Tezkor surishtiruv ishlari natijasida gumonlanuvchining shaxsi va boshqaruvida bo‘lgan avtomobil davlat raqami aniqlandi. Gumondor qo‘lga olingan bo‘lib, u ilgari sudlanganligi xabar qilinmoqda.
Gumonlanuvchining so‘zlariga ko‘ra, janjal uning singlisi va jabrlanuvchi o‘rtasidagi kelishmovchilik oqibatida yuz bergan. Tergov harakatlari davom etmoqda.