TOShKENT, 8-iyun – Sputnik. Qirg‘iziston O‘zbekistonga elektr energiyasini eksport qilishni boshlab yubordi, deb xabar berdi Qirg‘izistonning “Elektr stansiyalari” OAJ matbuot xizmati.
Yaxshi qo‘shnichilik munosabatlari doirasida va Qirg‘iziston suv-energetika resurslaridan oqilona foydalanish maqsadida yoz mavsumida elektr energiyasi yetkazib berishni davom ettirish haqidagi kelishuvga erishildi.
"Elektr stansiyalari” OAJ va “O‘zbekenergo” AJ o‘rtasidagi shartnomaga ko‘ra, O‘zbekistonga elektr energiyasini uzatish 8-iyundan boshlandi va 2018-yilning avgustigacha davom etadi. Bir kilovatt-soatiga 2 AQSh sentidan, jami bo‘lib 500 mln kilovatt-soat elektr energiyasi eksport qilinadi", - deyiladi xabarda.
To‘qtag‘ul suv omborining 2018-yilga rejalashtirilayotgan suv hajmi elektr energiyasini eksport qilish imkonini beradi, energiya yetkazib berish hajmi tomonlarning texnik imkoniyatlaridan kelib chiqib muvofiqlashtiriladi.