O‘zbekiston maktablarida birinchi marta 9-may sanasiga bag‘ishlab tantanali tadbirlar o‘tkazilmoqda. Sputnik O‘zbekiston muxbirlari Yunusobod tumanidagi 302-sonli maktabda bo‘lishdi va ushbu tadbirni tomosha qilishdi.
Ta’kidlash joizki, yaqinda ochilgan maktabda 9-may bayrami ham birinchi marta katta shodiyona bilan nishonlandi. Bayramga mehnat faxriylari, veteranlar, mahalla yig‘inlari vakillari va boshqa mehmonlar taklif etildi. Shuningdek, irrigatsiya instituti harbiy talabalari o‘z chiqishlarini namoyish qilishdi.
Maktab o‘quvchilari urush yillarida kuylangan harbiy-jangovar ruhdagi qo‘shiqlarini kuylashdi, urush qatnashchilari qahramonliklariga bag‘ishlangan she’rlarni yoddan aytib berishdi.
Tadbir "G‘alaba kuni" qo‘shig‘ini jo‘r bo‘lib kuylash va kabutarlarni uchirish bilan yakunlandi.
Marosim so‘ngida veteranlarga maktab ma’muriyati tomonidan sovg‘alar topshirildi.