TOShKENT, 7 apr — Sputnik. Kanadada Humboldt Broncos yoshlar xokkey jamoasini olib ketayotgan avtobusning yuk mashinasi bilan to‘qnashib ketishi natijasida 14 kishi halok bo‘ldi.
Bu haqda mamlakat qirollik jandarmeriyasiga asoslanib RIA Novosti xabar berdi.
Avtobusda hammasi bo‘lib 28 kishi bo‘lgan. Ulardan o‘n to‘rt nafari halok bo‘lgan, qolganlar turli darajada tan jarohati olgan. Uch kishining ahvoli og‘ir.
Yo‘l-transport hodisasi juma kuni kechqurun Saskachevan provinsiyasidagi trassalardan birida yuz bergan. Hozirda halokat sabablari aniqlanmoqda.