TOShKENT, 28 fev — Sputnik. O‘zbekiston delegatsiyasi Budapesht shahrida "Vishegrad guruhi" va Markaziy Osiyo mamlakatlari tashqi ishlar vazirlarining birinchi uchrashuvida ishtirok etdi, deb xabar qildi O‘zbekiston TIV matbuot-xizmati.
O‘zbekiston delegatsiyasi mamlakatning mavjud iqtisodiy, intelektual va ilmiy-texnikaviy imkoniyatlarni inobatga olgan holda "Vishegrad guruhi" davlatlari bilan o‘zaro manfaatli va samarali aloqalarni kengaytirish tarafdori ekanligini bildirgan.
Uchrashuv ishtirokchilari mamlakatda keng ko‘lamli islohotlar o‘tkazish va chuqur o‘zgarishlar olib borish, xorijiy sheriklar bilan, avvalo Markaziy Osiyo davlatlari bilan aloqalarni mustahkamlash, ko‘p yillik Afg‘oniston muammosi nuqtayi nazaridan mintaqada xavfsizlikni ta’minlash bo‘yicha O‘zbekiston prezidenti Shavkat Mirziyoyev tomonidan ilgari surilgan siyosiy kun tartibning asosiy qismlari bilan tanishtirilgan.
Forumda delegatsiyalar tomonidan mintaqalararo hamkorlikning yangi formati umumiy shaklda qo‘llab-quvvatlandi.
Shu kunning o‘zida vazirlar forumida ishtirok etgan delegatsiyalar rahbarlari Vengriya Bosh vaziri Viktor Orban tomonidan qabul qilindi.