TOShKENT, 23 apr - Sputnik. O‘zbekistonda ilk bor o‘zbek va rus tillarida faoliyat yurituvchi "Shifokordan so‘rang" onlayn poliklinikasi sinov tariqasida ishga tushirildi, deb xabar berdi Sog‘liqni saqlash vazirligi.
Ushbu loyihadan foydalanish uchun www.AskDoctor.uz veb-saytida ro‘yxatdan o‘tish kerak. Buning uchun aloqa ma’lumotlarni kiritib, telefon raqam orqali tasdiqlash lozim bo‘ladi. So‘ngra tegishli yo‘nalish bo‘yicha shifokor va qulay bo‘lgan aloqa usullaridan (chat, audio yoki video) birini tanlash lozim.
Oldindan yoki muloqot paytida anketalar, kasalxonadan chiqqanligi to‘g‘risidagi hujjatlar, ya’ni, shifokorga tavsiyalarni tayyorlashda yordam beradigan ma’lumotlar tasvirini yuklash mumkin.
Shifokor maslahatidan so‘ng telefonga tavsiya yozilgani to‘g‘risidagi xabar keladi. Uni saytning shaxsiy kabineti orqali yuklab olish mumkin. Ta’kidlash joizki, loyiha maqsadidan kelib chiqqan holda, onlayn maslahatlar faqat tavsiya xarakteriga ega.Chunki shifokor masofadan turib, tahlil olish, harorat, bosim va pulsni o‘lchash kabi harakatlarni amalga oshira olmaydi.
Ushbu onlayn xizmatdan O‘zbekistonning har bir fuqarosi foydalanish imkoniyatiga ega bo‘lib, karantin tadbirlari davrida mutlaqo bepul.
Xizmatdan foydalanish uchun maxsus dasturlarni o‘rnatish talab etilmaydi va Internet brauzeriga ega har qanday qurilma (smartfon, planshet, noutbuk, kompyuter) orqali foydalanish mumkin. Brauzer sozlamalarida saytning mikrofon va vebkamera qurilmalaridan foydalanishiga ruxsat berilishiga alohida ahamiyat berish kerak.
Onlayn poliklinikaning barcha mutaxassislari Sog‘liqni saqlash vazirligida qo‘shimcha sinovdan o‘tgan yuqori malakali shifokorlar (shu jumladan, professorlar) hisoblanadi. Tez orada uyda bo‘lgan va tibbiy maslahatlarni taqdim etish uchun texnik imkoniyatga ega shifokorlarni ham jalb qilish funksiyasi ishga tushiriladi.
Bundan tashqari, ushbu saytda maqolalar, tavsiyalar va tibbiy ensiklopediya ham mavjud bo‘lib, shifokor bilan onlayn maslahatlashuvdan oldin kishi o‘zini qiziqtirgan savollarga javob topishi mumkin.
To‘satdan paydo bo‘lgan og‘riq va kasallik alomatlari paytida diqqatni jamlash juda qiyin bo‘lishini hisobga olgan holda, www.askdoctor.uz saytida oldindan ro‘yxatdan o‘tish tavsiya qilinadi.
Shuningdek, mamlakatdagi noqulay sanitariya-epidemiologik vaziyat davrida shifokorlar maslahati bepul ekanligini inobatga olib, shifokorlar bilan muloqot so‘zlashuv madaniyatiga rioya qilgan holda, haqorat va tahdidlarsiz o‘tishi lozim. Onlayn maslahat to‘liq davolanish hisoblanmaydi. Zarur holda shifokor-konsultant tez yordam chaqirishi yoki shifokor ko‘rigiga yo‘naltirishi mumkin, xolos.
Ushbu loyiha qisqa fursatlarda ishga tushirilib, ma’lum bir muddat sinov tariqasida faoliyat yuritadi. Ushbu davrda texnik nosozliklar yuzaga kelishi va matnda xatoliklar kuzatilishi mumkin. Shu bilan birga, ayni paytda shifokorlar soni kam bo‘lganligi bois murojaatchilar ko‘payib, konsultantlar band bo‘lgan taqdirda, birozdan so‘ng qayta murojaat qilib ko‘rish tavsiya etiladi.
